Íslenski söfnuðurinn í Danmörku hlýtur Verðlaun Jóns Sigurðssonar forseta árið 2024

Hátíð Jóns Sigurðssonar var haldin í Jónshúsi í Kaupmannahöfn í dag, 24. apríl, á sumardaginn fyrsta. Þórunn Sveinbjarnardóttir, forseti Alþingis, setti hátíðina og afhenti Verðlaun Jóns Sigurðssonar forseta. Aðalræðumaður að þessu sinni var Ágúst Óskar Gústafsson heimilislæknir og tónlistarflutning annaðist kórinn Hafnarbræður.

Verðlaun Jóns Sigurðssonar 2025 hlaut íslenski söfnuðurinn í Kaupmannahöfn og er þetta í annað sinn sem félagasamtök hljóta verðlaunin. Síðast var það árið 2016 þegar Dansk-Islandsk Samfund veitti verðlaununum móttöku. Í rökstuðningi fyrir verðlaunaveitingu þessa árs sagði m.a.: „Að mati forsætisnefndar Alþingis hefur íslenski söfnuðurinn í Danmörku gegnt veigamiklu hlutverki fyrir samfélag Íslendinga á Hafnarslóð um langt árabil, meðal annars með helgihaldi, sálgæslu og þjónustu við íslenska fanga og sjúklinga. Þá hefur söfnuðurinn staðið að aukinni samvinnu við danska söfnuði og með því eflt tengsl Íslands og Danmerkur. Fermingarfræðsla og barnastarf, ásamt messukaffi í Jónshúsi, hefur verið mikilvægur þáttur í félagslífi Íslendinga í Kaupmannahöfn og starfið stuðlað að því að rjúfa félagslega einangrun íbúa í nýju landi. Fyrir það hlýtur Íslenski söfnuðurinn í Danmörku Verðlaun Jóns Sigurðssonar.“

Myndir frá viðburðinum hér.